香港政壇元老級人馬、人稱「大Sir」嘅前行政會議召集人鍾士元原來喺今晚搞百歲大壽，喺西貢大宅宴請好友。八方聽聞賓客左中右同高官都有，連有啲未出聲嘅疑似特首候選人，都係獲邀嘅座上客，不過就冇請梁振英。而大Sir個保安就話呀，大Sir好好精神同魄力，日日返office㖭㗎！

同《蘋果》有百歲之約

話說5年前大Sir95歲大壽，《蘋果》記者同佢賀生日，佢同《蘋果》記者講，希望100歲生日時仲可以見到你哋啦！咁大Sir今日正日生日，喺屋企搞百歲壽宴，《蘋果》記者噚日諗住履行5年前約定，去賀大Sir嘅100歲生日。
當《蘋果》記者噚日中午攞住紮花到大Sir西貢大宅外，保安話大Sir已經一早出門去辦公室處理公務，仲話佢天天如是，魄力仲好過好多人！
《蘋果》記者最終等到下午約5點，大Sir座駕終於返到大宅，司機先從後座取出助步支架畀大Sir，之後佢慢慢行入屋企，大Sir透過保安向《蘋果》記者表達謝意，仲話好多人同佢賀百歲生日，噚日去咗好多場賀壽場合，佢見咗幾轉客人之後好攰，所以唔見《蘋果》記者喇。

李八方
mailto:[email protected]