鄭伊健向來識玩識食，唔怪得之年屆38歲都可以憑住大唔透嘅性格冧死女，今年初佢同梁詠琪（GiGi）分手後，已經先後同鍾嘉欣、舊愛邵美琪傳緋聞，可見伊健確係有計。
唔知呢期伊健係咪因為桃花所纏，所以要搵啲私人空間，早幾晚佢就冒雨夜遊，撇甩晒所有緋聞女友，同三個男人組成搵食四壯士，到九龍城海裕魚生壽司日本料理專門店開餐，當晚伊健面向門口而坐，其間見佢同班friend都傾得幾開心，間唔中仲嚟個陳浩南嘅瀟灑撥髮㖭。

吹足幾粒鐘

正當伊健四人夜話時，有兩名軍警咁啱經過店外，仲開電筒照下伊健泊喺錶位嘅RangeRover座駕車廂，望完一輪至離場，但伊健就冇理，繼續同班朋友邊擦魚生邊吹水，一傾就傾足個幾鐘，講到凌晨兩點至鬆人。
話時話，嗰晚伊健幫襯嘅魚生店係明星食肆之一，最出名就係新鮮魚生；而以前伊健帶動過娛樂圈玩他媽哥池同對講錶嘅熱潮，家陣年紀大咗冇咁好口靚仔玩意，但個格一樣搣唔甩，近日佢喺網上同fans推薦巴西作家保羅科爾賀（PauloColelho）嘅著作《牧羊少年奇幻旅程》（TheAichwmist），故事描述一個少年為咗尋夢而放棄父母希望佢做神父嘅心願，寧願做個牧羊人四圍旅行嘅古仔，呢本書至今全球銷量已經超過1000萬本，真係有眼光！