政府宣佈委任亞視前高層梁家榮任廣播處長領導香港電台，坊間反應普遍幾好，相信榮總有能力帶領港台員工一齊走入傳媒新時代。而大家歡迎榮總之時，有冇發現，冇乜人理過前任嘅鄧忍光？高調踩住黑地毯入港台、低調地無聲無息咁離開，有港台員工透露，鄧忍光早前已經以多種方法隱形，好少現身，相信佢都想盡快離開港台呢個傷心地。

冇員工搞歡送

有港台中人透露，出身政務官嘅鄧忍光，空降港台上任頭兩年「寸寸貢」，不時同員工公開互片，但離任前一年表現卻相當低調，唔知係無心戀戰抑或想避免開戰？包括佢突然申請唔用台長用開嘅「AM36」車牌同私家車，改揸自己嘅私家車，所以唔少員工因為見唔到台長座駕，連佢有冇返工都唔知。
除咗台長車「隱形」，據知上任初期都幫襯港台canteen嘅鄧忍光，之後都甚少喺canteen開餐，唔知係咪驚同員工同枱卻反枱？
雖然忍光變隱形，但有員工話，其實鄧忍光上任之初都成日用電郵和同事溝通，包括向員工定期匯報港台起新大樓、設新頻道，以及招聘員工嘅進展等，以往台長好少咁樣定期交報告，而佢亦會親自回覆同事電郵，就係內容比較官腔，但至少肯回應，唔係求其覆句「收到」就算，都可謂有種新作風。
八方聽聞鄧忍光離任當日，員工並冇搞任何歡送活動；反而之前同樣以政務官身份空降港台擔任副處長嘅傅小慧，因為任內人緣不錯，所以有員工同佢farewell。政圈盛傳鄧忍光會接任海關關長，唔知一眾關員，點樣招呼呢位新阿頭呢？
李八方
mailto:[email protected]