蔡少芬（Ada）噚日甜絲絲接受商台訪問，首次聽到有人叫佢做張蔡少芬，佢不知幾開心，仲話好鍾意呢個叫法。Ada唔敢形容同老公係天作之合，認為係好大恩典，仲話好滿意老公任何一方面。婚宴選擇低調進行，係同老公商量之後決定，Ada話：「好似有人不停追訪我爸爸，其實好影響佢兩個小朋友，因為佢哋可能未必知道有我呢個家姐。」

「完全想出位」

提到被內地女演員樓惠珍喺網上話係第三者，覺唔覺得俾人利用上位，Ada話完全有呢個感覺，佢話：「記得拍《珠光寶戲》外景，咁啱張晉同樓惠珍喺附近拍《溫州人在巴黎》，張晉嚟陪吓我嗰陣有見過對方，我覺得佢奇奇怪怪，我honey都唔鍾意呢個人，做嘢唔認真，做戲又唔好，都唔同佢講嘢。最奇怪佢同我老公仲有導演合照，點知最後佢將張相放喺blog，但係刪咗導演，完全想出位，呢個人好唔誠實，最基本尊重人嘅禮貌都冇，人哋結婚就拎啲嘢出嚟。」
Ada仲話唔擔心會激嬲對方，因為佢同老公都未嬲，相反朋友就替佢哋唔抵，好似陳法蓉喺網上力撐張晉，點知就被樓惠珍嘅fans鬧，所以Ada同老公決定要出嚟回應吓。