莫雷拉停賽，上次（11日）日馬唔少馬迷熱捧田泰安，但係佢表現就認真令人失望，只係贏隻閘前落重飛嘅「韻妙星」，好幾隻賽前預知熱門都搏失或跑到無影，其中尾場熱到兩倍嘅大熱門「白鷺飛翔」飛到大外欄，後上輸個幾馬位跑梗頸四，直情跑到離晒大譜。

唔係話熱門輸咗就入騎師數，啲馬點跑馬迷有眼睇，好似田泰安騎嘅另一隻大熱「翔惑」，睇到隻馬推落去都冇反應，冇人會怪責騎師。

田泰安唔係唔識搵遮擋再喺馬群博位，佢過去用呢招贏過唔少馬，唔知點解整整吓越跑越老襯，成日走外叠蝕位入直路再飛到外父咁外，唔係隻隻馬有分喺手蝕得起，吓吓咁跑真係想唔輸都難。

馬迷最㷫嘅係，就算跑最窄嘅C跑道，田泰安都唔使飛到貼住外欄啩？「白鷺飛翔」呢條跑線，保守估計最少蝕多幾個馬位，係馬迷都知道，田泰安作為職業騎師反而冇諗過？根本「白鷺飛翔」就算贏唔到都最少第二，三甲不入完全係騎師問題。

競賽小組賽後有查詢田泰安嘅跑法，又係一輪廢話了事，始終都冇解答到點解佢要飛到咁外嘅公眾疑問。

田泰安解釋話要喺馬群以外搵位，無疑競賽小組係奈佢唔何，但係騎師跑隻大熱門騎到咁，由祁禮謙任主席嘅競賽小組都唔係一問一答講完了事，點解一句嚴厲譴責田泰安都冇？家吓問完就算，根本對馬迷完全冇交代。

馬有問題就要連串試閘及格，田泰安經常飛到大外欄，係咪佢手韁繩要改善？「白鷺飛翔」跑到咁，小組係咪應有警誡行動，要求田泰安喺受薪董事在場下通過連串試閘及格？小組毫無行動，難保稍後再有別有用心騎師有樣學樣。

阿Joe