花旗嗰邊有幾唔掂，睇吓金融股嘅表現就知，房地美俾人downgrade，Countrywide先傳破產，跟住就話俾人收購，但股民好似冇乜反應，繼續悲觀，事實上亦冇辦法樂觀，花旗同美林兩間大行，啱啱先至搵咗主權基金注資填氹，𠵱家又話要搵新資金繼續填數，都唔知幾時先至填得滿。因為冇人知道個氹有幾深幾大。花旗股市前晚話就話升咗啲，但係市場氣氛就認真麻麻。
投資者好悲觀都唔知點算，伯南克呢個時候出嚟講嘢，梗係個個都聽到實，一路聽美元就一路跌，原因係伯南克話經濟下跌嘅風險唔細，佢仲話聯儲局會採取果斷行動，投資者對聯儲局月尾減息半厘即刻變得好有信心，但唔係當好消息炒，因為咁即係話經濟危危乎，睇情況昨晚花旗股市仲會有沽壓，不過，如果真係減半厘息，跌完之後嘅股市應該會有較大幅嘅反彈。
港股昨日嘅勢都幾差，跌363點，係高開低收嗰隻，100日線失守，今次唔知頂唔頂得住，頂唔住嘅話就要試埋25862個低位，再低啲就係25000關。

招行升勢可持續

招行C輪4542：招行（3968）發「盈喜」之後股價反彈，昨日報收31.90元，向上個勢仲keep住，短線有機試34元，破位睇36元，可以小注買招行C輪4542短炒，昨收53仙，有效槓桿4.2倍，正股升上36元，4542看84仙，有近6成升幅，正股跌穿30.50元止蝕。