兩位英格蘭國腳連格同拉舒福特日前喺酒店遇上咗件尷尬事，話說兩位曼聯球星周一就喺酒店房間入面等緊髮型師嚟幫佢哋整頭髮，不過球隊嘅保安人員竟然誤認一位英軍球迷就係髮型師，仲帶咗佢去連格同拉舒福特間房。

當嗰位球迷入到房之後，連格同褔仔都不以為然，仲同嗰位不速之客握手同傾計，10分鐘後當真正嘅髮型師嚟到，事件先至被拆穿，好彩嗰位球迷並無惡意，只係想見吓球星，兩位球員都冇受傷同受驚，不過就好鬼「瘀皮」喇，成個過程仲畀過位球迷偷拍埋㖭。

英格蘭足總就發聲明表示，事後已經報警，不過經警方了解後，認為事件並冇涉及任何犯罪行為，最後並冇拘捕任何人，英格蘭足總就表示以後會加強保安，防止再有同類事件發生。

-------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM