由ARON、JR、REN、旼泫及白虎組成嘅韓國五人男子組合NU'EST，當中旼泫因成為限定男團Wanna One嘅成員而暫停NU’EST活動，餘下四人就組成小分隊NU’EST W繼續活動。而NU’EST W今日就再次襲港，並於下午出席於觀塘舉行嘅記者會，為聽日嘅九展騷造勢，吸引500粉絲到場圍觀。根據現場保安透露有2樓嘅粉絲等見偶像時，唔小心跌咗電話及外置充電器落地下，幸好冇人受傷，其後台上主持亦提醒粉絲要小心跌手機。

下午6時NU’EST W準時現身，成員先用廣東話打招呼：「大家好，我哋係NU’EST W。」再逐一用廣東話作自我介紹，又大派心心冧港迷。提到事隔10個月再來港，白虎表示見到咁多粉絲，真係好開心，REN更賣口乖大讚港迷好靚。ARON用英文表示好感謝大家嘅支持，承諾聽晚會落力演出答謝大家。

是次來港，白虎表示想去尖沙嘴度過中秋節，ARON透露嚟嘅時候試咗香港嘅月餅，大讚好好味，非常喜歡。而完成港騷後，NU’EST W將去曼谷，之後佢哋就計劃準備大碟。

離開前，NU’EST W擺出心心甫士，向港迷撒嬌，之後再次現身，並行落台跟粉絲影大合照。

精選韓流，喺晒《娛果》
http://fb.com/appledailyent