明年3月11日呢個立法會補選大日子，固然重要，但查實中西區區議會年底嘅兩席補選，亦不可忽視，尤其東華選區，原屬民建聯當區區議員蕭嘉怡因為做官半途捨選民而去，令民記支持或因而流失，民主派磨拳擦掌想攞返舊地盤，民主黨地區小花伍凱欣同前建測界議員姚松炎據知都想披甲。

民主派強勢出擊，民記又點樣迎戰？有地區消息話，民建聯敲定由「同心網絡」秘書長劉天正（Timothy）上陣，而Timothy本身都係民記中西區支部委員，近日正式「出櫃」，著住黨衫喺東華選區擺街站宣傳，與此同時民記港島區立法會議員張國鈞亦喺Facebook貼出同對方嘅合照，形容為「中西區的新星」 ，仲指對方「盡得嘉怡的真傳」O添。

而Timothy嘅Facebook，過往罕有po同民記有關嘅內容，似乎若冇補選，都未必高調將身份公諸於世。據聞港大畢業嘅佢口才不俗，係港台節目「好孩子星期天」主持之一。而喺今年7.1，佢仲po咗張那些年做大戲時獲林鄭頒獎嘅相，hashtag「我真係識唱粵曲」。

嘩，連張國鈞都咁吹捧，由Timothy出戰，似乎呼之欲出？但有人就話睇定啲，唔排除呢個只係煙幕，真命天子稍後先會隆重登場。有建制派直言，冇十足把握打贏呢場仗，但似乎姚松炎易打過伍凱欣，因為區選始終睇地區工作多過政治形象喎。