上個星期睇完大狀阿媽嘅分享，我都有啲有感而發，我作為兩個孩子嘅媽打，又係一位企業融資嘅律師，有時諗返做律師，其實都犠牲咗唔少嘢。

做我哋呢行，隨時要飛。例如做IPO上市項目，就要飛去間公司或者間廠做盡職調查，一般至少要一兩星期，又例如做一啲M&A收購合併項目，買家賣家為咗表示誠意、抓緊時間，又或者怕單刁揚咗出去有差池，有時會以閉門會議形式洽談，一日未傾完未簽約，律師就陪住個客留守談判，總之食飯啦、開會啦，簽約啦，乜都「等埋律師」。我就試過因為咁，趕唔切飛番屋企陪個仔過生日。

又例如前幾個月，股市暢旺嘅時候，大股東同上市公司輪流發股賣股吸水，我就忙到應接不暇。股東或者上市公司一般會喺收市之後，同投行傾吓價錢，如果股票到咗佢哋嘅心水價位，當晚就會搵律師預備買賣文件，同埋第二日開市前按聯交所出公告。所有文件嘅預備同簽署，就要喺嗰十個八個鐘頭內通宵完成。有時做通宵忙完返到屋企沖完涼，先發覺兩個孩子已經返咗學，又緣慳一面！

另外，由於做較大嘅跨國項目時，往往需要「一大棚」專業顧問，例如投行、會計師、香港律師、中國律師、外國律師、估值師、市場研究公司等等，每日除了應付項目基本工作外，每個星期嘅重中之重，就係集體上電話會，向客戶報告進度，由於人數眾多，又要遷就各地嘅時差，往往要在晚上又或者週末上線，講呢啲成個鐘頭但無冇實際內容嘅電話會。有次星期六早上去個仔嘅家長會，一邊耳帶住藍牙耳機mute咗電話上線「聽」會，另一邊耳聽住老師比我個仔嘅寶貴意見，嗰一刻真係希望自己識「分身術」。

體力上嘅疲累，加上分身乏術嘅心力交瘁，有時亦覺得工作太忙而愧對孩子，但我有次無意聽到個仔似懂非懂咁同婆婆話：「我知道媽媽好勤力返工，我都要好好勤力返學。」嗰一刻，我好安慰好感動，希望能以身作則，教好孩子將來無論做邊行都好，要記住成功需苦幹而不是父幹。

法網絲人@法政匯思

法政匯「絲」－法律界「絲打」，脫下法律界最私密嘅絲襪，同大家赤裸裸gossip呢行嘅八卦趣事。