又一天大市波幅少於200點，以22000計，1%都唔夠，如此情況已連續兩天，前晚美股升勢凌厲，但港股高開後，唔夠兩分鐘已見頂。對此筆者不感意外，因為4月16日期指於21999低開後，試圖反彈，但到22146亦行人止步，從此產生一輪跌浪，這是整浪跌勢的第一個裂口低開，現在升至此水平，總要爭持一輪方可破關，故此昨天士佳寄語學員AO（競價盤）平衍生工具好倉，實非看淡後市，只因戰場在細價股，唔想浪費彈藥。
老實說，筆者極看好中期後市，只希望大市來個小回，可以買得更安心，反正手上個股已入了一籮籮，就算爆升亦唔怕可惜。近日見有評論擔心細股風險，風險當然有，但漁翁撒網加上控制注碼，明知山有虎，反正風險可以控制。

首選創板變身異動股

現在久不久就有一隻升50至100%，買唔中只蝕幾巴仙，買中1隻夠10隻捱，加上細價股今年未認真炒過。現在大價股悶極，窩輪牛證波幅有限，資金轉炒蚊型股，如果想玩但又冇頭緒，可以留意8字頭的創業板股票，最好0.5元以下、成交異動，當然曾經改名變身者，優先考慮。
以上想法，與坊間基本分析論調南轅北轍，老實說，這類股票的確大部份也不應長揸，因基本因素欠奉，業務如火麒麟，那裏熱便往那裏去，實在危險。但以陰謀論去想，業務乏善足陳連散戶都知，話事人更是瞭如指掌，現在經營環境困難，最便捷莫如利用財技，高價轉讓股權，但唔踢上又如何散貨？
現在散戶們小心翼翼，無人看戲又怎會散場，所以當他日見散戶趨之若鶩，便是小心時候。現在筆者嚴控注碼，繼續鬥儍，穩當的投資者則切記揸緊宗旨，永不沾手，就算他日有堂皇理由也不接燙手山芋，不然就是賺時小心唔賺，蝕時大膽承擔了。

張士佳
寶來證券（香港）董事　投資服務部
mailto:[email protected]