韓劇《繼承者們》27歲男星金宇彬上月表示因患上鼻咽癌，目前要停工及專注於治療，日前就有韓媒爆料指金宇彬喺演員女友申敏兒陪同下到醫院接受治療，給予對方好大嘅支持，令外界大表感動。

金宇彬近日正專注治療，不過噚日就突然出現一個自稱係金宇彬嘅Instagram帳號，仲上載咗一張金宇彬嘅背影照，相中金宇彬企喺寫著「HOLLOW」嘅畫前，仲加上「後退」、「hollow」呢兩個標籤，令外界猜測係金宇彬患癌後首次自己公開近況。

不過有心水清嘅粉絲就發現呢個係一個假帳號，並唔係金宇彬本人，而呢個「近照」事件越發越大，就連韓媒都有報道之際，金宇彬所屬事務所就發表明表示：「上載到該IG嘅金宇彬背影照已經係好耐之前嘅相，而且金宇彬只有微博帳號，並冇IG帳號，唔清楚該名開假帳號嘅人嘅用意，我哋已經要求用戶刪除IG嘅貼文，不過對方唔肯。」