衞生福利及食物局常任秘書長尤曾家麗,最近因為夫家乃革命烈士之後而人氣急升,佢太公尤列係國父孫中山嘅密友,當年同陳少白以及楊鶴齡等四人,成日喺香港歌賦街嘅楊耀記相敍搞革命,被稱為「四大寇」,認真厲害。
尤太話,佢老爺尤嘉博係尤列嘅過繼子,老爺在生時一直有整理尤列嘅墨寶同文章,並且編寫緊一本《尤列集》,諗住留畀後人同送畀圖書館,後來老爺前兩年突然病逝,佢同丈夫尤迪桓就接手完成,啱啱好政府徵集放置喺孫中山博物館嘅文物,佢哋當然好樂意捐出太公墨寶。
尤太話,尤列當年搞革命,曾經被袁世凱軟禁過喺天津,以牽制孫中山,後來得同鄉幫手先至逃回香港,尤家原籍廣東順德,但係尤列就病逝於南京,尤迪桓當年都有去過修墓。《尤列集》話,1886年尤列同族兄尤裕堂醫生行經水果店,見同學孫中山等人因購荔枝與店伴發生爭執,就上前排解,因而相識。
(圖)尤列(右)與陳少白(右二)、孫中山(左二)及楊鶴齡(左)被稱為「四大寇」。後站立者為關景良。
傳真︰2623-9278
電郵︰
[email protected]