當年今日
關於我們

日選美腿女星 神田多女Fans
米倉零脂肪玉腿最迷男士

蘋果日報 2003/02/20 00:00


一個美女嘅性感象徵,除咗樣靚身材正之外,唔少人都會好似我羅拉咁,鍾意睇埋佢哋嘅靚腳。最近有本日本時裝雜誌,搵咗成千個讀者選出美腿藝人,頭五位起碼有三個係模特兒出身,由結果之中亦會發覺,女人同男人睇靚腳嘅角度都幾唔同㗎!
大部分女仔都會買絲襪,所以做過絲襪代言人嘅神田UNO同江角真紀子,喺女仔心目中零舍吃香。好多女仔鍾意神田對腳幼得嚟好有魅力,坐嘅姿勢亦型過人,所以佢成為眾多女性心目中嘅美腿藝人。

紀香又白又滑
男士就覺得神田對腳唔夠「肉地」,反而鍾意米倉嗰雙近乎零脂肪嘅靚腳,佢哋重睇得出米倉成日做gym,因為佢雙腳好有線條美,梗係啦,米倉以前跳芭蕾舞㗎嘛!
而喺男女讀者心目中都係有一雙美腿嘅藤原紀香,就被認為完全冇一般女性大腿肥大嘅問題,雙腳又白又滑,亦冇瑕疵。而江角真紀子拍《庶務二課》嘅短裙制服look咁經典,唔入選就奇啦!

步姐入圍費解
我羅拉都好認同讀者嘅心水靚腳嘅,但係連濱崎步同BritneySpears呢啲出咗名唔夠高,腳又短嘅藝人都入選,就覺得好費解囉!