日本暢銷漫畫改編嘅電影《死亡筆記》9年前上映時大受歡迎，今年自從日本NTV台宣佈咗拍劇集版，一直備受注目，但係公佈咗由26歲男星窪田正孝扮演夜神月，20歲上位男星山崎賢人則飾演L之後，啲《死亡》粉絲反應麻麻。但係今日NTV公佈咗其餘角色，就被踩得仲慘，因為其中一個頗為重要嘅角色彌海砂，竟然搵巨乳水着女佐野雛子扮演，即刻被噓爆。

電影中由戶田惠梨香飾演嘅彌海砂，喺觀眾心目中留下深刻印象，但劇集版由33F水着女佐野雛子扮演，就有粉絲話冇乜演戲經驗嘅佐野，同戶田嘅演技相差太遠。而且今日發放嘅彌海砂造型照，佐野仲有張彎腰晒巨乳嘅照片，加上個造型相當娘，有不少網民指摘風塵味太重。亦有網民指戶田明明係平胸，但今次就整個爆乳彌海砂出嚟，但亦有漫畫粉絲為佐野平反，話漫畫嘅彌海砂其實身材唔錯。