林夏薇喺灣仔開設第十間嘅點心火鍋店，今日正式開張，佢就請咗一班好友朱晨麗、李施嬅同洪永城等撐場。

林夏薇話呢間旗艦店試業咗一個月正式開張，第十一間店亦準備喺聖誕前開幕。至於投資金額，佢就話要視乎地區同揀選嘅菜色，每間店舖都要投資七位數，但今次就以點心為主題，希望可以同街坊拉近啲距離，俾佢哋多一個聚腳地傾偈。

講到佢生意越做越大，但林夏薇就話暫時未諗上市問題，亦未諗開拓大陸市場，今年佢就以《公公出宮》提名萬千星輝頒獎禮嘅最佳女配角，咁問佢想攞獎定上市？佢話：「所有嘢都冇諗，演員有獎係鼓勵，生意好又值得開心。」夏薇話做生意仲喺學習階段，畀自己去投資。

剛開設畫廊嘅朱晨麗話最近要拍劇同畫廊兩邊忙，今次特登嚟捧場，會向林夏薇請教營商心得，問到會否入股？佢話：「等佢邀請先，做生意我冇乜意見，一齊開心有錢一齊賺。」原來佢有心願係開慈善餐廳，希望能做到提供免費餐予社會中老弱貧苦人仕。