亞視噚日喺大埔錄影廠舉行「2018亞洲小姐競選：大中華賽區」記者會，宣佈今年喺香港再搞番亞姐選舉。今年係亞姐30周年，前年同去年亞姐只喺內地舉行，噚日仲請咗16年冠軍李思琪同17年冠軍何丹妮撐場，兩女仲簽咗藝員合約。
亞視高層何麗全話已有20多個賽區開始接受報名，11月會舉行決賽，包括大中華區、香港及海外佳麗。問到亞視仍有資金搞亞姐嗎？何麗全話：「今次有幾個贊助商，所以製作費一定唔少。」何麗全強調今次揼本大搞，除安排佳麗賽前到海外受訓，還有星級導師教跳舞同化妝等。

前亞姐爆未拎后冠

亞視早前裁員，何麗全話唔影響製作：「之前係自然流失，嚟緊有啲節目有需要會請番人，8月會公佈新節目出街。」何麗全話暫時未計數搞亞姐會唔會回本：「一定好多廣告客戶支持，有信心cover到，亞姐係亞視全年最大嘅投資項目。」11年亞姐冠軍馮雪冰卻爆料：「選咗亞姐7年，但係仍然未攞到后冠，獎品同埋獎金攞到，但都好想申請番一個，因為好有紀念價值。」
亞視首席財務官黎明輝仲宣佈吳雨同區偉林今個月會離職：「兩人已唔係高級顧問，佢哋搞掂開台就功成身退。」黎明輝又否認財困：「鄧先生依然係亞視嘅最大投資者，亞視債務重組進入最後幾個月，會將所有債務還番晒畀債權人。」
撰文：馮仁昭