關楚耀同王灝兒（JW）今日喺港台接受由Ben Sir主持嘅節目《U秀幫》訪問，Ben Sir透露兩位嘉賓會同大陸學生喺廣東話同普通話作交流，並唔係要搞對抗。

關楚耀表示回想喺台灣工作初期，曾鬧出語言上笑話，佢話：「我淨係識叫滷肉飯，所以我淨係食滷肉飯，有一次我叫珍珠奶茶飲，同侍應講想要飲管，但我講咗『啜管』，做埋動作，對方都唔明，後來先知係叫『吸管』。」識當地女仔對講普通話會好啲？關楚耀認為係，但最重要唔好怕面懵，又指佢嘅普通話老師係周杰倫。

對於關楚耀講到呢單笑話，令Ben Sir想起一件事，佢話：「有次我喺台灣嘅咖啡館，睇到餐牌入面話『看不起你』，原來要用普通話讀，所以即係cappuccino，呢個好有趣，當時刺激到我情緒。」

JW則透露自小學到大學都有讀普通話課程，所以溝通上冇問題。問佢哋會唔會請Ben Sir幫手作詞？Ben Sir即刻話：「興趣當然有，正如我想中六合彩一樣。」JW反而想Ben Sir多開班，因為佢覺得時下年青人有好多懶音，又用錯詞。」

精選娛聞，喺晒《娛果》
http://fb.com/appledailyent