張繼聰、衛詩雅噚晚喺圓方出席電影《告別之前》首映禮，鍾舒漫同大肚嘅董敏莉專程去捧場。電影係兩年前拍，由三組有親人患上癌症嘅故事組成，題材沉重，張繼聰覺得自己所演嘅角色好有挑戰性：「講生離死別，但我唔想太多喊，場場喊唔得，處理每場傷感戲，要特別加啲功夫，傷心有唔同層次，每日放工都辛苦，個心好痛，太投入，拍戲唔可以唔投入，但太投入又驚，希望呢部戲令多啲人關壞，曾經有呢啲經歷嘅朋友。」而《告別之前》嘅導演劉孝偉早前疑騙逾千萬元後失縱，有傳呢部戲係差啲上唔到畫，但張繼聰就話一直都知上映係冇問題：「關於呢個消息，我都係睇新聞睇到，唔評論啦！」

至於着白色吊帶裙現身嘅衛詩雅，明顯又肥咗喎?佢笑話：「我一直以為自己瘦咗，因為之前肥咗改食得清淡啲，最近好忙，噚晚凌晨四點至收工，因為太肚餓，忍唔住食咗朱古力，可能咁肥咗，我太鍾意食，嚟首映前都食咗PIZZA。」詩雅又講到最近買咗部二手車：「幾萬蚊，計落我晚晚坐的士返屋企都好貴，所以買車化算啲，又唔使俾陳家樂笑我黐佢車。」

精選娛聞，喺晒《娛果》
http://fb.com/appledailyent