當年今日
關於我們

【被潑紅油】何韻詩力斥被告道歉廉價 為香港司法徹底崩壞感憤怒

蘋果日報 2020/06/09 19:57

何韻詩暴動王宗堯潑紅油

何韻詩去年到台參加「撐港,反極權」9.29台港大遊行期間,遭中華統一促進黨自忠黨部主委胡志偉等成員潑紅油。台北地檢署今日依強制、公然侮辱等罪起訴胡志偉等11人。同樣今日,在香港卻發生王宗堯、劉頴匡等涉7.1闖立法會,律政司將改控暴動罪,最高刑罰可囚十年!
阿詩接受《蘋果》電話訪問表示,「今日收到消息,知道上年喺遊行時被潑紅油襲擊嘅case,11名統派人士終於被起訴,心情都有啲複雜,唔知應該開心定為香港慨嘆,因為好老實講,如果喺一個有法治嘅地方,如果有人無啦啦被襲擊,被有政治目的嘅人公然侮辱,應該受到制裁。」當日涉潑油的胡志偉表示願意跟她道歉,阿詩不屑說:「佢話願意道歉,我覺得好荒謬,被捕已經走唔甩先嚟話同你道歉,呢啲道歉好廉價。」阿詩指暫時未需要去台灣出庭,本身2月要去落口供,後來因疫情取消,「慶幸即使我過唔到去,嗰邊嘅律師同地檢署繼續跟進案件,我好想多謝佢哋。」
相比之下,阿詩認為潑油案件如在香港發生,不會受到公平審訊:「你見香港政府或成個司法制度,都係有一個徹底嘅崩壞,講真一個咁嘅case喺香港,首先佢唔會告,真係告嘅話,上到庭可能會話『佢有高尚情操』,所以你可想而知,香港面臨幾可悲同令人慨嘆嘅狀況。香港市民無論係唔係公眾人物或政治人物,你嘅生命安全冇受到保障,嗰種濫捕情況、選擇性執法、龍門任佢搬、隨時話你暴動就可以亂咁改罪名,呢個我覺得法治社會唔應該咁樣,所以你問我感覺,我真係唔識講,我唔敢講話開心自己呢個案件得到公平審訊,因為香港真係太多我哋嘅同伴,好多傷人案或被跟蹤,有明顯證據嘅案件,全部冇可疑不受理。」
阿詩慨嘆:「如果香港發生嘅話,當然警察部門唔執法,惟有靠小眾勇敢嘅人去民事訴訟,但都需要好大量資金,可能需要眾籌,呢個路程係甚艱難,對比下更凸顯民主同法治重要性,點解喺台灣被襲擊,你可以得到公平對待,有公平公開審訊,但原來呢個唔係必然,喺呢個時代,必須面對好多極權打壓,亦凸顯台灣體制嘅完善,無論我呢單個人案件或大到政治人物會被罷免,點解我哋要去追求民主,就係我哋想有選擇權利,同有一個保護我哋嘅政府,好無奈我哋冇咗,所以只可以靠自己去捍衛生命安全。」
反觀,香港今日卻發生王宗堯等人被改控暴動罪,阿詩力斥港府濫權,呼籲大家要撐住:「至於今日睇新聞,知道七一立法會案幾位朋友,包括我都識嘅王宗堯,知道佢哋突然間被改做暴動罪,仲要明日就要上庭,係令人非常憤怒一件事,亦都好可悲,我哋已經好常見呢啲手法,無論律政司或成個執法部門,其實佢哋都係嘗試用一個極為濫權及冇章法可言嘅方法,令到你哋唔好再行出嚟或者再發聲。今日6月9日,由上年嘅呢日到今日,我哋好無奈地不斷去經歷相同嘅事,大家成日面對呢啲新聞,作為會行出嚟嘅人,大家都知好快會輪到自己,但亦冇辦法,面對極權,佢哋就係用呢啲方法,我哋可以做嘅,就係用我哋能力上可以嘅方法繼續做,如果掉轉去諗,當年台灣亦經歷好多黑暗時期,才行到去有民主嗰步,當然香港未來係點冇人會知,但唔可以因為機會渺茫而放棄,你有一絲希望,都係可以令我哋繼續行落去嘅動力,大家惟有繼續撐住。」
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
empty
何韻詩去年在台灣出席遊行時被潑紅油。(台灣《蘋果新聞網》資料圖片)
empty
王宗堯被改控動罪。(資料圖片)