閩信（222）又係1年跌足8成嘅中資股，落到價值區，開始睇位收集。閩信最新NAV6.7元，現價（1.31元）折讓高達80%。閩信家陣揸住華能A股（滬：6000111），呢期A股調整，華能股價亦跌，閩信身家縮咗水，就算係咁，呢個NAV折讓已經非常吸引。再講，A股仆到直一直，長線價值，俾短線恐慌情緒蒙蔽晒，閩信中長線受惠華能升值，家底自然水漲船高。
又閩信另外揸咗廈門國際銀行36.75%。後邊廈銀，係以1倍P/B入賬，而內銀股經過今年調整，P/B都講緊1.5倍樓上。即係話，廈銀潛在增值仲未反映，閩信NAV亦未秤到盡，閩信實際NAV折讓分分鐘又唔止80%。
閩信再跌，昅實通道底1蚊兜底，到時，集團重秤前NAV折讓上到85%，冇有好驚。中線博閩信翻半番到1.50元，目標價P/B，仲係講緊0.22倍，仍然係殘到唔殘。

　

東方娛樂博變身

東方娛樂（009）8月完成10供19，現價炸到得番6.4仙，係上市以嚟偏低水平，現水位應該冇乜蟹貨。集團呢劑供股成本價0.1元，即係話東方娛樂要重返供股家鄉價，要升56%。另連供股集資近1.4億銀，集團最新NAV0.167元，現價折讓60%，已經有唔錯嘅NAV墊底。又東方娛樂市值兩億銀唔夠，本身財政業務相當企理亁淨，有條件成為下一潮變身股。Beforethat，以雞仔注嚟冷敲，博集團重返供股成本價，回報率都幾肥仔。
錢雋