16歲模謝芷蕙（Cammi）舊年藉同舊愛陳冠希啜爆相上位，立即被陳冠希狠撇，大前晚佢俾人發現同高大新歡到銅鑼灣出巡拍拖，Cammi例牌唔怕冷晒長腿。有人報料話嗰晚10點幾見Cammi同個男仔喺銅鑼灣世貿上面影貼紙相，有途人好奇想睇真啲Cammi個樣，揭開布簾時，Cammi竟發爛渣爆粗：「望乜X嘢！」儀態盡失。

「保持友善眼神」

估唔到Cammi除咗鍾意搵ABC做男友，佢仲鍾意講XYZ，都好重口味吓，馮仁昭噚日打畀佢了解吓點解咁躁，Cammi呼寃話：「我的確係同個男仔朋友去影貼紙相，嗰日排後面嘅人一直唔停咁講我，指指點點，不過我都保持友善眼神，我可以發誓我冇講粗口鬧佢哋，我從來唔講粗口，最粗魯都係講『頂』。可能佢哋唔鍾意我咪屈我囉！」
發生爆粗事件後，有新歡番的Cammi，心情好快靚番，佢哋嗰日仲拍拖行維園花巿，Cammi示威話：「佢買咗Kitty汽球畀我，而我就送番佢一個公仔。」Cammi仲放相上微博，不過講到新歡身份，Cammi話：「我哋唔係拍拖，識咗幾年，佢喺美國返嚟放假，噚日就走，咪一齊行吓花巿。」