要不是勇士連番「食叉燒骾骨」，唔只贏騎士22分咁少？周四NBA總決賽Game 1，勇士全場只係造出4次失誤，其中杜蘭特（Kevin Durant）零失誤下交出38分、8籃板、8助攻嘅「完美」表現，加上史堤芬居里（Stephen Curry）3分11投6中轟入28分，主場以113:91大勝騎士，場數領先1:0，兼延續季後賽連勝走勢至13場！

騎士初段防守頗為集中，加上撻着3分火力一度佔先，並逼得柏治利亞（Zaza Pachulia）同祖蒙特格連（Draymond Green）早早兩犯纏身，日前洛杉磯大宅家門被噴上種族歧視字句嘅勒邦占士（LeBron James）首節已經獨取13分；不過，勇士首節「dunk」力無窮造出7次入樽，而且尾段重拾外投手感，首節領先35:30。

騎士第二節防守開始走樣兼失誤頻頻，兩度俾KD如入無人之境快攻入樽，單係LBJ單節已經造出7次turnovers，係近12年最差紀錄；反觀勇士喺半場竟然只得1次turnover，進攻籃板亦比騎士多，造就起手次數多對手18次下，半場領先60:52。

第三節可謂成場波轉捩點，勇士頭4分鐘已經打出一段13:0攻勢拉開21分，其中上半場手感麻麻嘅「咖喱仔」單節射入4個3分！反觀騎士「三巨頭」進攻方面表現尚可，但其餘球員齊齊冇貨交，另外兩位正選T湯臣（Tristan Thompson）同JR史密夫（J.R.Smith）全場竟然只得3分，落後21分進入第4節下仍然追趕乏力，最終以91:113大敗；今場攻入28分、成為季後賽得分突破6,000分第一人嘅占士歷來8次躋身總決賽，Game 1錄得1勝7負嘅差劣戰績。勇士場數領先1:0，Game 2香港時間下周一8:00am繼續喺勇士主場Oracle Arena上演。

根據統計，NBA總決賽Game 1勝利一方，有70%機率高舉Larry O'Brien Trophy。KD賽後表示：「我諗我哋一開波有些少緊張，錯過一啲上籃同open shots，但我哋第二節起集中過來。」

雙方焦點球員統計
杜蘭特（勇士）：38分、8籃板、8助攻
史堤芬居里（勇士）：28分、6籃板、10助攻、3偷球
祖蒙特格連（勇士）：9分、11籃板、2助攻、2偷球
勒邦占士（騎士）：28分、15籃板、8助攻、8失誤
K艾榮（騎士）：24分、3籃板、2助攻
路夫（騎士）：15分、21籃板、3封阻