一直性向成疑的台灣前男團飛輪海成員炎亞綸，今個月初被指疑一腳踏三男，與男友人的激咀相曝光（相關新聞： https://bit.ly/2yWwHqA ），點知後來禍不單行，炎亞綸婆婆喺13日病逝，炎亞綸喺ig發文悼念後，就一直冇任何消息。

事隔五日，炎亞綸今日終於現身，出席喺台北搞嘅「怪物亞綸生日趴」，炎亞綸出場時睇落心情唔錯，仲同fans講：「嗨，我今天需要你們的心，親愛的怪物」，之後就自彈自唱《親愛的怪物》。

不過，當炎亞綸唱到送俾婆婆嘅《Tears in Heaven》後，佢就好感觸咁話：「明天是外婆的頭七，我還是想站在這裡，因為我覺得生命不容許我退縮，生命要我抬頭挺胸面對。」提到婆婆，炎亞綸仲可以忍住眼淚，不過當佢提到要多謝經理人一直陪住自己嗰陣，炎亞綸就忍唔住喊咗出嚟，之後當主持人Lulu同炎亞綸擁抱、以及睇見現場fans幫自己打氣，炎亞綸亦忍唔住再喊。

而炎亞綸又有感而發咁提到一直好擔心自己嘅心情，仲問大家可唔可以將自己過去18年直接刪走。除此之外，亦有多謝現場fans：「無論如何謝謝你們，應該對我來說是最奇怪的生日，此時此刻的我，很想說我愛你，很多事情很多時間很多情感過了就不會回來，希望你們可以繼續愛我」。

精選娛聞，喺晒《娛果》
http://fb.com/appledailyent