【銅鑼灣】去年尾喺中港照相器材主席孫大倫細仔孫道熙嘅婚宴上，着上同新娘林珊亭同款婚紗踩場嘅第一代𡃁模活希兒，喺事件爆出後佢嘅律師形象受損，結果俾律師樓勸喻離職，搞到感情事業都冇着落。事隔幾個月後，前晚活希兒同媽咪喺銅鑼灣利舞台出現，食飯時活希兒不時愁眉苦臉，睇嚟件事對佢影響同打擊都幾大。

搭小巴返歸

前晚約8點幾，着住羽絨褸孭住個Chanel手袋同戴帽嘅活希兒同媽咪喺銅鑼灣利舞台出現，佢一身打扮極之普通兼且師奶味甚重，同佢嘅樣貌一啲都唔合襯。活希兒同媽咪揀咗一間西餐廳食飯撐枱腳，見佢哋好似好趕時間咁拿拿聲點菜就食，又叫侍應幫佢加啲調味料，一邊食一邊同媽咪傾偈，唔知係咪吐苦水？冇耐活希兒已經食完，醫好肚後唔知係咪枱上冇牙籤，只見活希兒係咁用條脷嚟撩牙，個嘴郁吓郁吓都幾失儀，係男士見你咁樣都扣晒分啦。
活希兒同媽咪快食約一個鐘就搞掂，之後埋單走人，離開商場落扶手電梯時，活希兒又不停嘴同媽咪傾偈，真係仲長氣過啲老人家。跟住兩母女冇節目，行去附近嘅綠色小巴站一齊等車返屋企。
採訪、攝影：陳辰、吳耀輝、徐錦池