嘆完燒肉或者麻辣火鍋，套衫唔洗的話，幾日都消唔到陣味。這個世界只要有需求，就自然有商家諗到方法供應產品解決問題，Panasonic將在9月初於日本推出一款具備除臭功能的衣架MS-DH100。這衣架最特別的地方是在衣架設有8個出風口，只要接上電源後就會噴出Nanoe X分解衣物上的汗臭、煙味、燒肉味或花粉，掛上幾個鐘就再聞唔到異味咁話。

睇番官方產品介紹，消除汗臭同燒肉味的效果最明顯，有需要時可加上衣物套；而MS-DH100就有兩種操作模式畀大家揀，分別有5小時標準模式及7小時長效模式，大可掛衫前可以索一索陣味勁唔勁，到底揀5小時抑或7小時操作模式。

當然日本電器在細節位設計上花過心思，如這款除臭衣架操作時只有35dB噪音，半夜掛衫都唔會嘈住瞓覺；而且耗電量低，用1次電費都唔使1日圓。就算衣櫃附近無電源插口都唔怕，因為佢支援用外置電源都可操作，若揀選5小時正常模式用上一個5,000mAh就夠用。當然除臭衣架MS-DH100價錢同普通衣架有段距離，每個價錢約為20,000日圓（約$1,400），預計9月初正式發售。如果日本及台灣酒店可以引入這款除臭衣架就好，晚晚食燒肉或火鍋都唔使洗衫。

資料來源：Panasonic
記者：布偉倫

2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily