【延禧班底】新劇《皓鑭傳》登場 聶遠細心幫吳謹言提裙
聶遠延禧攻略吳謹言皓鑭傳
熱播劇《延禧攻略》,捧紅咗飾演魏瓔珞嘅吳謹言,連其他角色包括演乾隆嘅聶遠都人氣高漲。噚晚騰訊影業舉行年度發布會,《延禧》製作人于正,連同吳謹言、聶遠出席,帶同《延禧》升級版新作《皓鑭傳》登場。行紅地毯時,穿上粉藍色長裙嘅吳謹言,挽住聶遠進場,細心嘅聶遠仲彎腰幫吳謹言提起右邊裙,等佢唔會踩到自己裙邊,聶遠如此貼心舉動被網民大讚。
呢套《皓鑭傳》故事背景發生戰國時期,吳謹言飾演秦始皇母親李皓鑭,而聶遠飾演呂不韋,至於《延禧》班底「高貴妃」譚卓、「明玉」姜梓新及「袁春望」王茂蕾都有份參演。在台上吳謹言講到再次跟《延禧》班底合作感到高興,今次喺《皓鑭傳》入面,佢同聶遠有好多對手戲,佢話︰「跟遠哥有很多對手戲,跟《延禧攻略》是非常不同,因為皓鑭與呂不韋是合作伙伴,故事精彩,演員又演得過癮,希望大家喜歡《皓鑭傳》。」
此外,有份主演嘅寧靜,亦一同出席發布會,第一次跟于正合作,佢話︰「于老師的戲很捧人,想捧誰就捧誰,哪怕演技差一點,也可以(因為角色)一夜之間就火了。」佢呢番話引起台下譁然,然後佢又補充話:「他們表現很好,合作了不只一部戲,很有默契。」唔知係咪寧靜講錯嘢,喺騰訊官方網入面就cut咗寧靜呢段台上說話。
精選娛聞,喺晒《娛果》
http://fb.com/appledailyent
紅地毯上吳謹言撟住聶遠,聶遠幫佢提起裙行。(微博圖片)
吳謹言話今次同聶遠,喺新劇有好多對手戲,但有別於《延禧》。(微博圖片)
吳謹言喺新劇《皓鑭傳》演秦始皇母親李皓鑭。(微博圖片)