杜如風今早現身機場，首度以客席導遊身份帶團到日本本州5日4夜，講到今次行程，杜如風話今次好有壓力：「團友畀咗咁多錢，$88888一個人，死啦，我畀番啲咩人哋好呢，之前開茶會嘅時候，我有問佢哋想我表演啲乜，我希望盡量滿足到佢哋嘅要求，唔好反我枱，因為團費太貴。」

杜如風仲透露會cut本身去睇風景嘅地方，佢話：「帶團友去買嘢，因為我買嘢最耍家，可以幫佢哋襯埋衫都仲得。」如風一再強調壓力大，直言希望可以滿足團友要求。

不過今次杜如風會做乖乖女，事關會帶埋媽咪去旅行，佢話：「對上一次同媽咪去旅行，我係13、14歲，0依家係第二次帶佢去旅行，根本就係搵自己笨，好似帶住矛盾去旅行，因為佢唔畀我買嘢，咁我帶團友去買嘢，我梗係會買埋一份，但佢又唔畀我買，所以一定會嘈，好彩聽日係赤口，嘈晒佢之後任買唔嬲。」

最後，杜如風祝大家恭喜發財、新年快樂、身體健康，杜府仝人鞠躬。