香港唔止樓貴，連帶車位都炒到天價，天價車位價去到600萬元，真係唔知要擺部乜嘢車，先襯得個車位。

最近榮升人妻嘅菲律賓棉欄老島公主陳昭昭，都北上大灣區買車位喎，仲順便幫一間停車場拍咗輯廣告。車場老闆出動一部私伙法拉利同馬莎拉蒂拍攝，昭昭話代言費都唔易賺，停車場嘅室內溫度高達42度，廣告拍咗十個鐘，一返到屋企就病咗。

昭昭公主話，比起香港嘅天價車位，大陸車位都係二、三十萬一個：「香港車位就買唔起，大陸車位都可以。」仲話：「香港人近年都去大灣區置業投資啦！」

昭昭公主表示，佢本人鍾意買磚頭，但香港啲樓真係太貴入唔到手，唯有北上買住大陸車位先喎。

政府近年其實一路都喺到叫緊香港人同年輕人北上去大灣區發展，有位姓蔡嘅政協，仲話香港市場規模有限，年輕人未來發展應融入國家發展大區，以「大灣區人」嘅角色去諗嘢喎。但係大灣區真係天堂咩？治安問題嚴峻，近日亦有新聞就話廣州因為水浸漏電，電死好多人。最重要係，真係相信大陸新聞嘅透明度？

問到昭昭點睇大陸配套，佢好似啲高官咁，大派定心丸，話今次幫襯嘅發展商係香港上市公司，市值幾百億0架：「應該唔使擔心管理同配套，因為大陸真係有咁嘅需求。」佢仲話買磚頭未試過蝕錢，次次都係賺錢，反而股票就試過蝕錢，所以都唔敢買股票。

佢仲畀咗幾張上星期五影嘅車場相，車場出面啲車浸到上頂，佢話：「好彩我買個車場好乾爽啊！所以啲車主入晒嚟租停車位，我買嘅四個車位都租出了。」唔知昭昭公主記唔記得杏花邨上次停車場水浸變水塘件事呢？

精選娛聞，喺晒《娛果》：
http://fb.com/appledailyent