今日（23日）舉行今年最後一次沙田賽事，編八草兩泥，草地用A加3欄，度地儀指數2.71，場地掛牌為好地。今日將不會進行壓地。

睇番去年最後一次田草日馬亦係用A加3欄，當日度地儀指數2.72及掛牌好地，賽果具參考性。當日偏差唔算嚴重，雖然半數頭馬守前四位入直路建功，不過亦有「精益旅程」、「知多福」及「精彩樂韻」從尾叠後上反先對手，不宜過份側重前置馬。

今日第十場「豈等閒」今季三戰獲一勝兩位，贏馬正是田草A加3欄，今次重返強項可望贏季內第二Win。第七場「醒蹄飛」是全場唯一贏過A加3欄之戰馬，憑較佳場地性能有力重開勝門。

泥地方面，今日硬度計指數10.54，掛牌好地。今日兩場皆跑1650米，近三場同程分別有「通勝」及「軍炮」後上勝出，以上兩駒今次列陣第四場及第八場泥地一哩，值得留意。