今朝晨早7點半，劉嘉玲已經貼幾張滑雪相上微博，仲叫自己做「Early bird」，其中一張坐吊車上雪山嘅相，坐喺嘉玲隔籬着黑褸嘅男人，雖然戴咗滑雪鏡遮住半個樣，但睇佢個cool cool哋表情，已經出賣咗自己係型爆嘅梁朝偉。

眼利嘅網民紛紛留言「你老公真帥」、「大早上起來秀恩愛」、「看到梁生好激動！永遠幸福啊！」有網民仲貼咗年前滑雪時見到偉仔嘅相，力證偉仔有同一副滑雪鏡。

而嘉玲嗰兩張單人相，估計出自梁朝偉親自操刀拍攝，而相片嘅背景應該喺富士山，原來朝偉同嘉玲去咗日本度歲，其實前日嘉玲都貼咗短片上微博，寫道：「過年好，祝平安、健康、幸福！」佢同偉仔坐喺白皚皚嘅雪地上，浪漫滿瀉！