賭王何鴻燊昨日正式退任澳博（880）主席，由二房二女何超鳳接任，佢就話以後澳博會「一齊商量、一齊合作」；至於爸爸身體健康則「OK」、「我諗佢都96歲，要畀時間佢好好享受人生」。不過呢位新主席就冇得享受喇，皆因股東絕冇畀面，仲狂問高質問題挑機，連公關事後都要向華華打聽，「喂，佢哋係記者定股東啊？」

超鳳：感受到股東支持我

澳博股東絕唔簡單，副主席蘇樹輝啱啱想話宣佈股東會結束，就有股東舉手閘住話要問問題，問題之多之專業，華華都不禁拜服，上至澳博市佔率年年跌，問公司點解救，下至新項目上葡京點同同行鬥兼吸引客人，仲有一個直踩衞星娛樂場經營不善、毛利率低，仲建議管理層考慮收返經營權咁話！
好彩蘇樹輝經驗夠深，都一一解答到，至於新主席何超鳳就冇答到股東問題，直至出去見記者，先話董事會會一齊合作，又話要學習爸爸云云。當然例牌有多謝董事會同股東支持喇，仲話感受到「股東係支持我做主席」。至於問到佢同爸爸作風有咩唔同？佢就窒咗一下，似乎未諗到有咩分別，最後惟有謙虛講聲要繼續向爸爸學習。
今次股東會，一班高層盡顯齊上齊落精神，除咗大家夾晒口供話一齊帶領澳博，就連出去見記者都要團結一番，華華就聽到公關話：「等一等，等陣一齊出去！」一家人咁齊心，外界仲點質疑你哋權鬥吖。

李華華
mailto:[email protected]