滙證每年都會出份亞洲必買股票精選組合，並稱呢啲股做HiddenDragons，今年該行列出3大投資主題，第一，係周期增長股，第二係受惠原材料價格下跌股，因為今年商品價格睇淡，第三係價值股。組合共11隻股票，有5隻喺香港掛牌，認真畀面。
周期增長股滙證揀咗信義玻璃（868）同宜進利（304），受惠原材料下跌股有建滔化工（148），價值股則有雨潤（1068）同偉易達（303）。舊年兩隻港股精選股，華寶（336）一年下來升咗四成，但現價偏貴，故此今年唔再揀，今年呢幾隻，最睇好應係雨潤，現價7.27元，目標睇14.30元，有潛質升一倍嘅股票，值得收藏。

九方發輪炒定先

二三線股終見炒味，部份過氣基金股去年底仍屢創新低，例如精電（710）、晶門（2878）等，上月年結前基金仲沽緊。呢類股近年面對原材料價格上升，自然好難炒起，但自從年初商品價格大跌，呢類股前景唔同晒，基金分分鐘要重新買番。除咗傳統工業股，科技股買盤都好勁，科網熱潮時狂炒嘅科聯（046）、長城科技（074）、e-Kong（524）等掃到飛起，既然有資金儲齊貨炒上，呢轉唔多唔少都要跟番多少，首選當然係精電、晶門呢類科技實業，次選輪到晶片股。
至於公司有科技兩個字嘅冷門股，大中華科技（8032）升15%，九方科技（8129）升13%，一創科技（8111）升13%，深圳科技（106）升12%。上述股票中，九方科技日前剛宣布私人配售2.49億份認股權證，行使價7.6仙，若悉數行使，九方將可額外集資1894萬元。呢批輪發售價2.5仙，即連同成本，正股0.101元先至係打和點，若要吸引投資者行使，似乎仲有水位可走。
歐陽風