繼續帶大家睇下今屆書展，放心，唔係又係露暈女晒假點，而係榕兒(黃榕)、Donut成員Elise同Elke今日喺書展交換寫真。之前試過當眾除「猶有餘溫」嘅底褲送俾fans嘅榕兒，是日換上低胸露腰衫同熱褲，有fans要求簽名時更俯身倒奶，性感過著透視衫露黑bra嘅Elise。

問榕兒(兒／姨隨你啦！)今日性感打扮都入到書展？佢話係夏日女仔打扮喎，咁係咪攞正牌入場0架？佢話係：「冇人趕，安全入場。」

講到場內多學生，榕兒依然話呢身衣著好多女仔都係咁著，冇歧視眼光，反而話見到好多對手奇裝異服。

嗱，係咪明示緊係AD2成員Amy呢？榕兒話：「唔知件衫係乜，打晒格，點解無端端除衫，唔明新一輩宣傳手法，我衣著靚，尊重場合。」其實件衫打格，一來係因為太出位，二來真係太核突(重點)，費事嚇親大家啦!

榕兒又話，今次揀同Donut交換寫真，係因為佢哋形象健康性感，同自己一樣有加入世界盃題材。榕兒又話，自己本書加入學咗8個月嘅鋼管舞，以及學咗幾年嘅街舞落去：「冇睇其他人嘅寫真，題材悶，得陽光海灘，同酒店房，樣認唔到，未叫得出名，個樣唔自然，冇興趣睇，欣賞Donut個樣自然。」