泰昌餅家閂咗又開番，肥彭真係有口福，因為佢老哥準備喺下個月十至十三號回港一行，推介佢本新書《Notquiteadiplomat》（中文有人譯做「非一般的外交家」），當然唔少得返嚟美食一番，幫襯吓歐陽老闆食番個蛋撻。
顧名思義，末代港督呢本新書係講佢近年外交生涯嘅所見所聞。肥彭由九二年起任港督，同北京就加快香港民主步伐問題南轅北轍，冇辦法傾得埋，結果被中方破口大罵，魯平出到「千古罪人」，都算冇晒面畀。但係今時唔同往日，肥彭當年因為唔肯同中方先打招呼，就喺施政報告推出新九組嘅政改方案，結果被北京封殺；而煲呔𠵱家就事事先畀北京過目，中央梗係錫晒佢啦。
政治冇永遠敵人，肥彭九七落旗回國後，又東山再起，當上歐盟外務專員，重曾經應邀去北京中央黨校對住班共產黨員演講，你話魯平係咪枉作小人？舊年肥彭唔再做專員，轉去做牛津大學校監，同時埋頭寫書，一方面回顧過去一段時間外交生涯，論盡遇到嘅各國領袖，包括法國總統希拉克、俄羅斯總統普京、美國前總統克林頓、現總統布殊，以及英國首相貝理雅，而中國前總理朱鎔基竟然係佢最推崇嘅領導之一。
肥彭英文好，觀察力又強，又冇有怕，由佢去寫班政要一定好好睇，佢重批評外交政策同世界事務唔應該只係由啲專家去寫同講，呢樣嘢涉及每一個人，大家都可以令世界更好，但首先要了解乜係外交事務。

重提區會委任議席

聽落佢本書主要寫西方政治，八方唔知佢有冇提及香港舊事，否則魯平一定在其中，當年佢哋為香港政制發展拗到面紅耳熱，今日睇番轉頭，覺得有啲可惜，因為如果當時大家肯稍稍忍讓，就不致於經過十七輪談判，最後無功而還。八方重記得英國駐北京大使麥若彬宣布談判破裂嘅一刻係幾無奈同失落，因為對於一個外交官嚟講，談判失敗等於玩完；肥彭當時搞政治唔係搞外交，考慮當然完全唔同。
講起嚟都好巧合，十七輪談判最後觸礁，係同英方要取消區議會委任議席有關，事隔多年，估唔到又舊事重提，今次輪到特區政府港英餘孽煲呔同肥龍要保留委任，你話世事係咪好荒誕？
肥彭下個月來港，會接受訪問，到時煲呔唔知會唔會向佢取吓經問吓路，肥龍增加五個區議會立會議席嘅方案肯定偷肥彭舊橋，但係保留委任同增加功能組別議席就同肥彭當年理念背道而馳，佢兩兄弟唔知好唔好意思見番個舊老細呢？

傳真︰2623-9278
電郵︰[email protected]