熱浪風暴 毀滅全人類
戈爾揭《絕望真相》超驚嚇
應該冇人比美國前副總統戈爾(AlGore)更適合主演(抑或主持?)《絕望真相》(AnInconvenientTruth),因為佢親身經歷過:明明半隻腳入咗白宮都做唔成總統,邊個夠佢絕望?不過數世間絕望之事,做唔成總統只不過輕於鴻毛,未必死得人,然而全球暖化危機,直接影響人類存亡!戈爾話嘅。 撰文:戶川淳
嚴格嚟講將於下月5日喺香港上映嘅《絕望真相》並非電影,甚至連紀錄片都稱唔上,齣戲只係戈爾主持嘅一個環保講座錄像,即係話你買飛入場,將會睇住呢位出名悶人嘅政客,做個半鐘頭PowerPoint。咁咪慘過返工開會?錯!影片自從喺辛丹斯電影節上映後,獲各地影評大讚,更稱娛樂性較預期高得多,原因係講座嘅內容太恐怖,原來地球生態污染實況,驚嚇過好多荷李活災難片。
其實自戈爾喺2000年美國總統選舉中落敗後,就將佢整副心機轉投於環保事業之上,穿州過省舉行全球暖化災害嘅演講,時至今日,同類講座已喺各地學校同酒店舉辦超過1,000場。其中一次,電影監製LawrenceBender成為座上客,佢覺得戈爾嘅演講好有意義,但每次卻只有一小撮人可以參與,就算戈爾一年365日都開講座,都冇辦法將訊息帶到全世界,於是Lawrence決定將講座拍成電影,仲搵埋著名電視紀錄片導演DavisGuggenheim執導,利用動畫加科學證據作輔助,務求令電影拍得更緊張、更吸引。
《絕望真相》中最精采嘅部份,並非戈爾嘅講詞,而係佢所展示嘅驚心動魄畫面:非洲第一峯克力馬札羅峯同喜馬拉雅山積雪正急劇溶化,令全球氣候大變,前者嘅積雪可能喺2020年全部溶晒。有史以來最熱嘅十年,都發生喺近14年內,03年熱浪就喺歐洲肆虐,熱死咗三萬人;海洋溫度不斷上升,將醞釀更多更大型嘅風暴,氣溫改變亦會衍生出更多疫病。
不過,戈爾指出人類面對呢個真相並非無能為力,只要肯改變生活方式,用科技減輕環境污染,另一方面向政商界施壓,一定可以令地球復元。因為呢個信念,令《絕望真相》喺辛丹斯電影節中得到高度評價,獲觀眾三次起立鼓掌致意。