笑一笑，世界更美妙，賭王千金何超蓮去年與一班志同道合嘅朋友成立咗「Smile with Us HK 一起微笑」志願團體，希望為香港市民打打氣，為他們增添笑容。成立志今，超蓮不時都會舉行活動，好似街頭派扇，中秋時又派過月餅等，而明天就會聯同容祖兒成立嘅「容祖兒慈善基金」喺銅鑼灣皇室堡舉行「一起微笑 美麗在望 福袋傅愛行動」，超蓮同祖兒希望透過今次嘅義賣活動，籌得40萬，並將善款捐予「語橋社資」，幫助高中聾人學生於中學文憑試嘅應用學習科目中，得到手語傳譯服務。

連日來，超蓮都好落力咁係社交網宣傳呢個活動，剛才佢仲將義工們預備好嘅福袋，拍成短片，上載到Smile with Us HK嘅FB專頁，另一邊廂，超蓮亦將福袋送到剛為大劉劉鑾雄誕下細女嘅甘比家中，呢啲慈善活動，甘比當然義不容辭啦，佢即時同福袋合照，並將照片上載到ig，幫超蓮同祖兒呢個活動宣傳，甘比留言話：「3月8日下午2:30一定要嚟皇室堡地下中庭支持超蓮同袓兒的福袋義賣，好有意義呀！」呢張相亦係自甘比誕下細女後，首度喺ig見到佢嘅相，相中嘅甘比架上太陽眼鏡，側側地身咁孭住個福袋影相，見到甘比經已收身，兼且精神不俗，但據知甘比將不會親到皇室堡支持超蓮同祖兒，據知甘比最近都忙於餵人奶，兼且要接送仔女返、放學，所以都比較疲倦。

精選娛聞，喺晒《娛果》
http://fb.com/appledailyent