已經有家室嘅澳門賭業猛人周焯華（洗米華）因為同Mandy Lieu搞婚外情，最終搞到老婆陳慧玲（Heidi）要同佢離婚，就快回復單身嘅洗米華，噚日俾本報率先報道過佢同Mandy一齊去咗泰國布吉度假，有周刊仲追訪埋今次布吉之旅，Mandy有帶埋囡囡一齊去，又話去完旅行會返香港過年，洗米爸會見佢兩母女㖭。

下月回港定居

但係查實後日年廿八洗米華會同老爸、家姐、仔女去東京旅行，根本唔會喺香港過年，之不過Mandy確係計劃3月回流返香港定居，洗米華都諗住同老婆搞掂離婚手續之後，就會搬到香港同佢哋一齊住。
今日有讀者爆料，將洗米華家姐Candy嘅facebook留言轉發俾本報，佢留言雖然冇指名道姓鬧邊個，但明眼人一睇就知佢係針對Mandy嚟講，嘩！成段文好多粗口，佢留言話：「你XX死八婆……你咪X屈我老爸，你咪X儍啦，人在做天在看，臭八婆你咁X賤同X街，你爸媽知道嗎？」據知情者講，洗米爸一家都仲係同洗米嫂一齊住，好錫呢個新抱，呢啲時候佢老爸冇可能肯見Mandy母女。
撰文：馮仁昭