王力宏噚晚南京出席商演活動遇上無妄之災，當時佢企喺台上面，突然有觀眾向佢掟水樽，擊中佢腹部。王力宏遇襲後表情痛苦，彎低身掩住腹部。有網民聲討施襲者，並且譴責主辦單位冇做好防護工作。

在場歌迷表示，王力宏受襲後企都企唔穩，不過依然堅持繼續表演，並且同歌迷講：「謝謝，不要扔東西，謝謝，因為我看不到。」記者事後詢問王力宏傷勢，佢表示冇事，襲擊者後來亦被捉到，原來係某個瘋狂fans。據知該名fans已經唔係第一次襲擊王力宏，而且仲多次表示自己係王力宏妻子，話等待王力宏公開兩人關係已經等咗5年。