當年今日
關於我們

  新問責局長個個信耶穌 - 李八方

蘋果日報 2003/02/20 00:00


特首董建華嘅新班底今年首次同香港市民共度新歲,八方忽然發現當中嘅新局長,清一色係基督徒。佢哋包括年初二去車公廟上香為港人求得下籤嘅何志平、被指羊年唔應該打羊呔嘅馬時亨,同埋年頭喺落馬洲支線動土儀式冇上香嘅廖秀冬。而原來唐英年同李國章都係基督徒,但有冇廖局長咁虔誠就唔知喇。

朝朝開早禱會
睇番班舊人,就各種信仰都有。好似曾蔭權同孫明揚都信天主教,連梁愛詩都係,但佢就唔似得煲呔咁成日去教堂;董特首出名信風水(雖然冇聽過佢話信乜教),梁錦松、王永平、葉澍堃同楊永強聽講冇特別信仰,葉澍堃話只是係導人向善佢都會信喎;林煥光信佛,而葉劉淑儀同林瑞麟就係基督徒。
十一個局長中有過半數係基督徒,有人就笑住咁話,阿董當日搵人入局搵得咁辛苦,好彩有班願意「犧牲」嘅基督徒肯捱義氣,所以阿董成日叫班問責局長減薪,佢哋都冇出聲,朝朝早開「早禱會」(Morningprayer)傾吓時局更加冇問題。有口痕友問八方,佢哋咁多人信耶穌,點解都唔聽陳日君支笛嘅。


傳真︰2623-9278
電郵︰[email protected]