白票危機，賭王發威，喝令千祈唔好亂嚟，投親白票實會知，好似已收到初步效果！
不過i-pork認為，不可掉以輕心！最弊係賭王言論，雖然字字有力，但迅速遭到官方孤立，好多選委真係以為，賭王發噏風，佢嘅意見只代表佢個人，咁過多十零日，見冇乜嘢，又試壯起個膽，到時啲白票又直線上升，又點算好？
最佳辦法，莫如由特府宣布：冇錯，張選票暫時唔會編號，至今為止，亦冇打算驗指紋，不過，由於E場選舉，國際關注，為提防英美勢力甚至拉登進行破壞，投票站內外，特府將會邀請人民解放軍重兵駐守，全副荷槍實彈，保護每一位選委個人安全，做到零干擾、零襲擊、零暗殺！
屆時，吮委在表上打交叉之時，將會有解放軍叔叔持槍昅實，不過唔使驚㗎，解放軍叔叔係保護選委而到場嘅，若然有任何人士，因高齡七老八十，兼糖尿病、柏金遜症等，入到個站內，腳軟企唔穩，解放軍叔叔仲會本着為人民服務精神，揸住支槍，埋嚟扶你企番正，仲會把住選委隻手填寫表格㖭。當然，喺邊個名旁打交叉，叔叔係絕對唔會干預，完全係選委自己出力，自己填嘅！
至於有刁民選委如長毛之流，癲起上嚟，想搶叔叔支槍，咁就唔客氣嘞，喺出面排隊等緊嘅選委，萬一聽到票箱幕內，長毛入咗去，跟住「砰」一聲，唔使驚喎，係我英雄的解放軍同志維護秩序唧！