吳若希（Jinny）的媽媽早前在大埔自炒單車重傷送院，經過連日的治療，終於稍見起色，正當Jinny以為可以鬆一口氣之際，昨日吳若希的外婆因老人病離世，享年73歲。面對連串打擊，幸好Jinny身邊有一班朋友支持，加上性格堅強，所以總算撐得住。

今日吳若希完成工作後，由助手陪同下，晚上7時抵達沙田威爾斯醫院探望媽媽，並大方停下來接受傳媒訪問，至八時左右好友KellyJackie亦抵達醫院。昨日吳若希表示還未想清楚是否向媽媽告之外婆死訊，今日她謂:「冇講到，我哋商議咗都係覺唔講。」問她可是跟媽媽的男友商議？她就表示是跟家人及公司同事商量下決定。

吳若希謂擔心媽媽得悉外婆死訊後，會受刺激影響康復進展，她說:「始終媽咪同婆婆關係好close，依家媽咪康復緊，進展好好，唔想stop咗佢呢樣嘢。」又表示自己心情已平伏不少，昨晚還在社交網寫了一篇文章:「好想同大家講好多嘢，如果人過咗去，我哋係撈唔番乜嘢，惟有對目前依家所擁有嘅嘢更珍惜。媽咪依家好好，更加應該focus喺媽咪嘅病情度，而唔係將既定嘅傷心擺喺個心咁耐，我亦都會繼續keep住工作，假設依家係我嘅谷底，我會慢慢爬番上嚟。」

談到本月以來接連承受打擊，吳若希表示:「我都有幻想過，噚日收到消息嘅時候(外婆病重)，都有諗，人可以喺短期內承受幾多打擊。我喺度刷牙洗面嘅時候突然流鼻血，我就喺度諗，第日做bodycheck時會否話我有cancer呢？一幻想到呢件事，我就覺得唔係咁難接受。既然我仲可以承受其他打擊嘅時候，依家就唔算係好差嘅情況。」

續問到可是等媽媽出院時，才告知外婆死訊？吳若希歎了一口氣，道:「唉，唔知呀。外婆都走得好安詳，因為佢係血壓低嘅情況下走嘅，冇乜痛苦。」至於可有遺言，她就說:「我哋親人嚟到時，婆婆已經好peaceful咁瞓咗喺度，時間就唔係好多，唔係好講到嘢，只係少少…對眼張開。今次係我第一次面對生死，我都以為我會好驚，原來離開嘅時候所有嘢都好平靜，因為婆婆長期有病患，離開對佢嚟講都係舒服嘅事。」又謂外婆兒孫滿堂，身後事由舅父阿姨打理，不用擔心，反而現在最重要是照顧公公。