蘇麗珊、顏子菲、陳婉衡、彭浩翔、莊思敏、莊思明、陳爽等，噚晚喺銅鑼灣出席《皇家特工:金圈子》首映禮，蘇麗珊講到同方力申合作演出嘅愛情喜劇《愛情奴隸獸》下個月中上映，因為係第一次做女主角，所以心情好緊張，自接演角色之後，好多人都將佢同鄧麗欣(Stephy)嘅阿寶做比較，佢話：「我演嘅初時都冇諗，直到大家問得多，我開始諗，其實我同Stephy演嘅版本好唔同，我個角色比較男仔頭，好粗魯，成日同方力申嗌交。」

問到有冇睇之前Stephy嘅版本嚟揣摩角色？蘇麗珊即刻賣口乖話：「葉念琛嘅戲，我由細睇到大，係好地道港產片。」至於劉嘉玲喺新戲《我的情敵女婿》入面，就做終極版阿寶，蘇麗珊亦有份客串，去到片場仲俾任達華話佢似劉嘉玲，都係眼大大。蘇麗珊笑話：「喺現場見到嘉玲姐，我就好似小fans咁，同佢合照，但佢好忙，冇傾偈。」覺得自己似唔似嘉玲姐？佢即話：「我真係高攀唔起，嘉玲姐上咗神枱，唔敢喺佢身上揣摩咩。」

至於同場嘅顏子菲，就低胸露3寸事業線，不過外加牛仔褸外套，佢笑話：「好熱，大家換秋冬裝。」見佢上圍豐滿咗，佢就話係衫嘅問題：「我跟教練做運動，一個禮拜上2、3堂，3圍平均細咗2至3CM，我有啲唔開心細嘅地方真係細咗。」有冇打算隆胸呀？佢話：「吓再嚟？放過我啦！唔再考慮隆喇！o依家34C都ok，再隆做運動會好大負擔，以前未隆會揀運動bra，隆咗，個胸大咗款式唔多，似阿婆款，要買外國牌子至有多啲款式，不過我唔介意做內衣騷同做代言人。」