70年代性感艷星邵音音，上周四晚出席慈善晚宴，忽然自揭患癌，令全場大為震驚。事後音音姐接受《蘋果》訪問時，透露自己十多歲時開始患皮膚癌，頸部做過多次手術，且不時發作，又稱分享經歷無非是想發放正能量，並樂觀謂：「人都要堅強生存，多一日算一日。」

音音姐一直低調抗癌，鮮有向身邊人提及病情，更未曾為醫病停工，包括最近她與黃文慧為奇妙電視主持全新節目《使乜驚 大兩Gen》，兩位同樣67歲嘅前輩拍住「巨胸翠如」鄧月平、鄺芷凡（Omi）、黃溢濠同吳智杰等一班後生仔做真人騷，互相體驗唔同年代嘅生活模式大玩特玩。

日前音音姐就孖住黃文慧及一班後生仔女去九龍灣鬥唱K，節目仲請咗廟街歌王尹光做嘉賓添。以前經常登台唱歌嘅音音姐，唔單止全程勁high不停「un」身「un」勢打拍子，唱《對你愛不完》時又跟班後生仔搶咪唱歌，之後佢第一次試唱難度甚高嘅神曲《忐忑》時，仲飆出「宇宙音」，勁過宇宙巨G.E.M.。

聲如洪鐘嘅音音姐，完全不覺身體有毛病。而最搞笑係音音姐唱完之後笑問在場人仕：「咩歌嚟0架？唱嚟唱去都係兩個音！」

講番當日音音姐、黃文慧同尹光一入到K房，面對揀歌介面操控都要啲時間熟悉吓。當日一眾主持先同尹光合唱《你老闆》，跟住加埋鄧月平唱《尹光串燒金曲》，面對住唱到七情上面嘅尹光，同埋投入狂un嘅音音姐及Bonnie姐，鄧月平初時好怕醜企後一步，經過大概半首歌時間，佢終於被尹光勁歌融化而起舞。

跟前輩合作，鄧月平話每次都把握機會同前輩溝通，但佢都話對尹光歌曲認識唔多，但留意到歌詞非常貼地，好似《你老闆》就道出打工仔對老闆心態，尹光就話呢首歌好道出時下年輕人返工賺錢都無本事買樓，連婚都唔敢結嘅悲哀喎。

另外，老而彌堅嘅音音姐拍住「老而彌In」嘅尹光喺另一集節目中，用GPS導航揸車搵路，跟一班攞住「地圖王」搵路嘅小鮮肉鬥法，音音姐笑稱：「碎料，我揸車多過班0靚仔揸筷子！」節目中一班後生仔女試過拉住音音姐排隊食茶餐，企到腳軟嘅音音姐大呻：「呢個世界係咪冇嘢食！」呢班「小朋友」又試過帶音音姐去垃圾房扮文青玩自拍，搞到音音姐大嗌「黐線！」