馬尼拉人質慘劇發生當日，煲呔打電話畀菲律賓總統阿基諾三世要求救人，點知打極都唔通，估唔到呢種慢三拍嘅官僚情況，會喺香港案件重演。
菲律賓政府代表團訪港做齣大龍鳳，菲國駐港領事館前晚發出採訪通知，噚日下晝一點舉行記者會，並要求各大傳媒事前打電話去留位。八方由前晚開始打電話，一直係「遺言」信箱，噚日朝早再打，無數次後終於有人接聽，但講咗兩句就發覺唔對路，因為對方竟然用英文要求八方講廣東話，細問之下，先發現對方竟然係另一間傳媒嘅行家。原來接線嘅領事館職員，唔知係咪因為太多電話應接不暇，竟然將打入嘅電話亂咁駁埋一齊，由得來電者自己傾偈！