上星期，本欄聲稱自己會博恒指反彈。事實上，撰文前周五早已買入恒指牛證。周一上午立即被打靶，全篇文惟一應驗嘅預言係：文章可能開市後只有3小時壽命。

至周四恒指反彈，高明上午已在電台開咪，通知要再博反彈，因為挾淡倉每月一遇，再凶猛嘅熊市，都唔會直線下跌。

埋單計數，第一次入嘅牛證，成本3仙幾，全輸。第二次以相同金額買牛證，最貼價嘅牛證成本已要8仙，贏3仙，明顯地，拉勻要輸錢走。但呢啲錢，不論贏輸都要參與。

唔少人留意到上周用字：博。港股本身投機味濃，再加上用牛熊證工具，本質上已係賭博，毋須掩飾。任何人有志學投資，應該去美股市場，先係真正有力創造價值之地。本港資金市底，加上國策常變左右大局，直接話係賭場也無不可。

既然係賭博，相對於美股長坐不動如山贏最多，或熊市cash is king現金為王，持續參與維持對大市觸覺變得重要，經常要有買賣，以免有朝一日大市真係見底，但太耐冇玩，脫了節，機會來了都無反擊之力。

今次博反彈，高明冇無限唱淡，反而稱將出現反彈，是實力；不過，過早下決定，最後一樣要輸錢離場，係實力不足。

至於未來，肯定係要繼續熊市，點解？因為中美再開貿易談判而炒上明顯借消息炒，高明唔使線人報料都可以知道，呢輪談判肯定無料到，如果雙方想和解，上一輪已和解，前一輪已唔會有關稅。

不用國際關係博士，任何香港返工擦過鞋嘅打工仔都應知道，兩大老細已開拖，餘下時間只會為啖氣，經濟損失並唔係考慮，直至出現明顯殘局，先有機會收手。現時雙方都覺得自己係最終大贏家，肯定無偈傾，炒上只係挾淡倉，港股再跌只係時間問題。

當然，如果連高明都咁諗，個個搵位再put過，今次挾淡倉力道可能一如十號風球山竹，將會挾到大家覺得牛市重臨密謀轉軚。到時，唔好手多走去開好倉就得喇！

高明
https://www.facebook.com/bigricetea