最近網上流傳「20大最美古裝女星」名單，引起熱烈討論。本報娛樂版亦嚴選十大古裝美人，王祖賢飾演嘅「小倩」冇得輸；陳玉蓮演活了不食人間煙火嘅「小龍女」；而翁美玲則是歷代最美嘅「俏黃蓉」。

No.1艷鬼王祖賢
角色：小倩《倩女幽魂》
王祖賢嘅古裝扮相美得像鬼，儼如女鬼小倩化身。佢着住絲衣，一顰一笑流露少女羞澀，但每個眼神又似勾魂，書生寧采臣（張國榮飾）被佢迷得失去方寸。

No.2脫俗陳玉蓮
角色：小龍女《神鵰俠侶》
世上最靚嘅姑姑，係陳玉蓮。喺螢幕前看見她，就明白乜嘢係「不食人間煙火」。令戲中至死不渝嘅愛情，淒美得像首詩。

No.3嬌俏翁美玲
角色：黃蓉《射鵰英雄傳》
金庸筆下嘅黃蓉，鬼主意多多，與儍郭靖係天造地設。翁美玲嘅活潑跳脫，將角色演得出神，可惜佢26歲就香消玉殞。

No.4勇敢余安安
角色：香香公主《書劍恩仇錄》
香香公主只能存活喺童話世界裡，佢嘅勇敢、堅貞、純潔，與俗世格格不入。初出道嘅余安安，有齊香香公主氣質，令佢一炮而紅絕對合理。

No.5貴氣孫儷
角色：甄嬛《甄嬛傳》
孫儷算不上絕色美人，只有着上清裝才突顯出古典美人特質，美艷得令人心服，就算喺宮內與一班宮女妃嬪勾心鬥角，仍不失貴氣。

No.6冰麗李若彤
角色：小龍女《神鵰俠侶》
李若彤飾演嘅小龍女跟陳玉蓮的又不盡相同，其眼神冷若冰霜，令人望而生畏，佢喺戲中被尹志平（陳啟泰飾）姦污一幕，全城憤怒。

No.7清純劉心悠
角色：若蘭《步步驚心》
劉心悠嘅清純外表，與密實嘅宮廷裝簡直絕配，心悠完美闡述「性感在骨子裏」定義。《步步驚心》大熱，亦打響咗心悠BB喺國內知名度。

No.8大眼林心如
角色：竇漪房《美人心計》
林心如喺《還珠格格》嘅紫薇，已美得令人窒息，想不到十年後演出《美人心計》一樣驚艷，難道佢一雙水汪汪眼睛，真能將時間停頓喺最美一刻？

No.9驚喜劉詩詩
角色：若曦《步步驚心》
作為穿越劇女主角，劉詩詩時裝扮相乏善可陳，偏偏溫柔賢淑嘅古裝扮相卻教人驚喜。《步步驚心》嘅成功，應有一半功勞歸她。

No.10妖艷蔣欣
角色：華妃《甄嬛傳》
華妃被塑造成囂張跋扈，為得皇帝寵幸，喺宮中用盡手段，角色絕對不討好。但蔣欣扮相帶幾分妖艷，其悲劇一生更牽動觀眾同情心。