老牌銀行廖創興上月底正式改名創興銀行（1111），《香港討論區》近期有好多網民講創銀嘅新招牌，有說似美心快餐，有人仲以為佢被內地中資銀行收購咗。
pkkpeter嘅評語頗為一矢中的：「創興話想吸引年輕客，但年輕人睇到佢個招牌都唔想幫襯！佢真係要認真想吓形象問題。」
長崎良美子都話：「啲人唔知，仲以為創記俾祖國銀行收購咗呀！娘到爆。」

以為俾中資吞咗

edisonchanhk踩得更盡：「有乜理由一間公司嘅招牌可能咁樣衰，紅噹噹一塊嘢，成個招牌得紅白兩隻色，單調到嘔。」
署名廖烈文（與主席同名）嘅網友，唔知係咪創興員工，佢話呢個logo原來係內部設計，「其實喺幾個月前，舉辦咗一個員工設計新logo嘅比賽。好多同事都設計得好靚，但係finally（最終）都用呢個logo，真係令人失望。」
銀行方面就話，個新logo係有搵外邊公司幫手，但就無評論係咪內部員工有份設計。發言人又話，佢哋為咗宣傳新企業形象，今個禮拜起就會有為期一個月嘅電視廣告宣傳攻勢，斥資接近成1000萬元。
雖然新logo無甚好評，但有網民喺討論區內，讚佢哋嘅新員工制服變得更為年輕化，而且女裝新制服嘅顏色配襯不俗喎！

報料站

無論在網上網外發現任何古靈精怪的財經趣事，歡迎提供文稿、照片或短片資料，一經採用，酬100元。請附姓名、電話及電郵地址，交[email protected]