為咗夢想可以有幾盡，一位歌手若果有機會踏上紅館開騷，又會去到幾盡？嚟緊九月會開人生首個紅館演唱會嘅周柏豪，今日去到屯門為新碟舉行簽唱會，順便宣佈開騷喜訊，佢仲喺六百幾位fans面前扯起埋支代表佢嘅大旗揮舞，Fans頓時尖叫聲四起，柏豪更冧盡Fans走落台同Fans合唱、影相、握手。

Fans送上啞鈴，希望柏豪操弗啲，屆時喺演唱會上騷肌肉，柏豪都想好似張家輝咁弗，不過只可以盡量操，因為要留力應付演唱會消耗大量體力嘅演出。

講到演唱會細節，柏豪話:「0依家秘密練緊一項危險性高嘅表演，詳情賣個關子先，公司都買咗超過七位數字保險，我諗我條命都值七位數。」嘉賓方面，佢希望邀請到容祖兒一齊上台唱自己寫嘅《天窗》，祖兒去年已經同佢講，若果開騷，要通知佢拎期，柏豪話希望可以心願達成。加油啊!