鄭雨盛今日以到尖沙嘴出席專賣店剪綵，首次以品牌形象大使身份嚟香港，鄭雨盛先以廣東話講「大家好！早晨！」同大家打招呼。

做完開幕儀式後，鄭雨盛就去到沙田馬場睇國際賽馬賽事，而今次更係佢首次入馬場欣賞賽事。平日工作繁忙，佢認為善用時間非常重要，工作以外，就會安排時間做運動同做自己鍾意嘅事，問佢幾時搵個女友拍吓拖？他就笑住話：「哈哈！o依家工作時間繁忙，到某啲時間要出現就會出現。」問佢幾時出現？佢就話：「呢個係順其自然發生，我都冇辦法控制。」

早前鄭雨盛去咗非洲做探訪，佢話行程係跟聯合國去當地探訪，了解難民嘅困難：「作為地球一分子，應該就人權問題多啲發聲，去幫助貧窮嘅人。」至於網上流出一張佢喺機場候機室瞓覺嘅相，佢解釋只係等候轉機而唔係滯留，所以同團隊把握時間好好休息。

對於早前同國際影星安琪蓮娜祖莉見面，鄭雨盛表示同對方一樣喺各自地區為人權工作，見面時都有交談有關難民問題，問到會唔會想同對方喺電影上合作？佢話：「其實知道大家喺各自國家有拍電影，都有傾過會唔會否喺人權或難民題材上合作，緣份到就會做。」鄭雨盛又透露，自己啱啱拍完電影，仲未計劃聖誕節會點過。

至於喺馬場擔任表演嘉賓嘅張敬軒，佢話今日會捧兩隻馬，包括朋友頭場出賽嘅馬匹，以及第九場同佢撞樣嘅騎師麥偉利騎嗰匹馬。舊年喺馬場有少少斬獲，軒仔話希望樂壇頒獎禮前可以繼續旺氣：「今次啲歌成績幾好，個人獎就隨緣，好多因素，人氣都緊要，好似今年多埋古天樂。」他笑指自己嗰票都會投畀古生，因為大家都期待古生上台唱歌，若然古生到時真係上台的話，軒仔覺得會全場合唱：「之前有諗過叫古生幫我拍片拉票，不過好意外佢入圍，所以如果拍就變成佢拉票。」今年樂壇有唔少新臉孔，軒仔話都要與時並進，留意新一代宣傳係點做，對住一眾小鮮肉，佢話：「我係小臘肉，仲可以保鮮，拎出嚟蒸一蒸又有另一番風味，仲帶少少梅香。」

精選娛聞，喺晒《娛果》
http://fb.com/appledailyent